Nú eru liðin 10 ár síðan lagt var af stað með átakið „Hættan er ljós“ til að sporna við notkun unglinga á ljósabekkjum. Að því stóðu Geislavarnir ríkisins, Krabbameinsfélag Íslands, Embætti landlæknis og Félag íslenskra húðlækna. Birt var auglýsing í dagblöðum 10. mars 2004.

Borið hafði á því að hluti af fermingarundirbúningi væri að fara í ljós og var átakinu sérstaklega beint gegn því. Mikill árangur hefur náðst, sérstaklega eftir að bannað var að selja ungmennum yngri en 18 ára aðgang að ljósabekkjum. Þetta kemur fram í nýlegum könnunum um notkun unglinga á ljósabekkjum.

Nýlega tilkynnti foreldri 14 ára unglings Geislavörnum ríkisins að sólbaðsstofa á höfuðborgarsvæðinu hefði hleypt unglingi í ljósabekk með þeim afleiðingum að húð unglingsins brann. Þessi tilkynning minnir á að enn er ástæða fyrir foreldra og eftirlitsaðila að standa vörð um þann árangur sem náðst hefur og er rétt að minna á þetta núna þegar fermingarundirbúningur er að hefjast.