Geislavarnir ríkisins gerðu 51 mælingu á rafsegulsviði frá farsímasendum á 16 stöðum sumarið 2018 í samstarfi við Póst- og fjarskiptastofnun. Niðurstöður mælinganna sýndu að styrkur rafsegulsviðsins var í öllum tilvikum langt innan viðmiðunarmarka ICNIRP fyrir almenning. Með hliðsjón af þessum niðurstöðum telja Geislavarnir ríkisins að ekki sé, að svo stöddu, tilefni til frekari aðgerða eða mælinga á styrk rafsegulsviðs frá farsímasendum á Íslandi.
Umræða um rafsegulsvið og rafsegulgeislun kemur annað slagið upp í fjölmiðlum. Geislavarnir ríkisins fylgjast með umræðunni um rafsegulsvið og hugsanleg skaðleg áhrif þeirra og eru í samstarfi við aðrar stofnanir um mælingar sem lúta að öryggi almennings í því sambandi.
Vísindanefnd Evrópusambandsins um nýgreinda og vaxandi heilbrigðisáhættu (SCENIHR) hefur nýlega birt niðurstöður sínar um hugsanleg áhrif rafsegulsviða á heilsu fólks. Yfirlit um niðurstöður nefndarinnar og íslenska þýðingu þess er nú að finna á fræðsluvef Geislavarna ríkisins.