Þann 6. september 2017 hélt Christopher Clement, vísindaritari ICRP, áhugaverðan og afar vel sóttan fyrirlestur í Veröld - húsi Vigdísar í Háskóla Íslands. Fyrirlesturinn var tekinn upp og þeir sem misstu af honum - eða vilja glöggva sig betur á efni hans - geta horft á hann.
Þann 6. september næstkomandi bjóða Geislavarnir ríkisins, Námsbraut í geislafræði við HÍ, Félag íslenskra röntgenlækna og Félag geislafræðinga til fyrirlesturs sem Christopher Clement, vísindaritari Alþjóða geislavarnaráðsins (ICRP) heldur um læknisfræðilega notkun geislunar. Fyrirlesturinn ber yfirskriftina Too much medical radiation? og verður haldinn í Veröld - húsi Vigdísar að Brynjólfsgötu 1, 107 Reykjavík, þann 6. september 2017 kl. 16:45. Aðgangur er ókeypis en skrá þarf þátttöku.
Nýlega komu út tvö ný leiðbeiningarit frá Alþjóðageislavarnaráðinu (ICRP), annars vegar rit nr. 129, Geislavarnir við notkun sérhæfðra tölvusneiðmyndatækja og hins vegar rit nr. 128, Geislaálag sjúklinga í kjarnlæknisfræði.
Nýlega kom út nýtt rit frá Alþjóðageislavarnaráðinu (ICRP). Ritið er númer 121 (ICRP Publication 121) og ber heitið „Radiological Protection in Paediatric Diagnostic and Interventional Radiology.“. Þá kom einnig út nýlega, rit hjá Alþjóðakjarnorkumálastofnuninni (IAEA) sem ber heitið „Radiation Protection in Paediatric Radiology“ og er það nr. 71 í ritröðinni: „Safety Report Series“. Í báðum þessum ritum er fjallað um geislavarnir barna við læknisfræðilega notkun röntgentækja og geislavirkra efna.
Norrænar kjarnöryggisrannsóknir (NKS) gengust fyrir ráðstefnu í Stokkhólmi þann 8.-9. janúar s.l. um hvaða lærdóm Norðurlönd gætu dregið af slysinu í Fukushima. Á annað hundrað manns sótti ráðstefnuna og fyrirlesarar voru á þriðja tug, þar af þrír sem eru leiðandi í alþjóðlegu starfi á sviði geislavarna.