Út er komin ný skýrsla um geislaálag starfsmanna sem vinna við jónandi geislun á Íslandi. Samkvæmt lögum um geislavarnir (44/2002) og reglugerð um hámörk geislunar starfsmanna og almennings vegna starfsemi þar sem notuð er jónandi geislun (627/2003), hafa Geislavarnir ríkisins eftirlit með geislaálagi þeirra sem vinna við jónandi geislun. Eftirlitið er framkvæmt með mælifilmum sem starfsmenn bera í 2 mánuði í senn. Ár hvert er gefin út skýrsla þar sem fram koma hóp- og meðalgeislaálag starfsmanna á einstökum vinnustöðum og samanburður við aðra þjóðir, þar er einnig að finna hóp- og meðalgeislaálag allra starfsmannahópa og samanburður gerður við niðurstöður síðustu ára.

Helstu niðurstöður eru þær að á árinu 2005 báru 524 einstaklingar mælifilmur frá stofnuninni og mældist geislun hjá 103 þeirra (19,7%). Meðal- og hópgeislaálag starfsmanna er nokkuð stöðugt á milli ára. Hópgeislaálag er margfeldi af meðalgeislaálagi starfsmanna og fjölda þeirra. Þess má geta að hópgeislaálagið fyrir 2005 var um 0,108 mannSv, sem samsvarar t.d. um 10 tölvusneiðmyndarannsóknum af kviðarholi.

Skýrslan er aðgengileg á vefsíðu stofnunarinnar:

http://www.geislavarnir.is/stofnunin/skyrslur/