Um þessar mundir er útfjólublár styrkur sólargeislunar í hámarki á Íslandi en það er svokallaðar UV-stuðull sem segir okkur til um styrk útfjólublárrar geislunar frá sólu. Daglega eru birtar tölur um áætlaðan styrk útfjólublárrar geislunar á Íslandi á vef Geislavarna á slóðinni uv.gr.is. Á mynd 1 má sjá þróunina á UV-stuðlinum á Egilsstöðum síðustu þrjá mánuðina miðað við heiðskírar aðstæður.

Mynd 1. Útreiknaður UV-stuðullinn á Egilsstöðum síðustu þrjá mánuðina, miðað við heiðskýrar aðstæður.

UV-stuðullinn er ekki aðeins breytilegur eftir árstíma heldur einnig yfir daginn og nær hann hámarki í kringum hálf tvö á daginn. Á mynd 2 má sjá hvernig finnska veðurstofan spáir UV-stuðlinum í Reykjavík fyrir 18. júlí, miðað við heiðskýrar aðstæður. Þar sést að útfjólublár styrkur sólar er hæstur milli 11 og 16 á daginn. Á síðu finnsku veðurstofunnar má finna sambærilega spá fyrir aðrar borgir í heiminum.

Mynd 2. Spágildi fyrir UV- stuðulinn frá finnsku veðurstofunni fyrir 18. júlí. Appelsínugulur er UV-stuðull 4, gulur er 3, ljósgrænn er 2 og dökkgrænn er 1.

Sé UV-stuðullinn 3 eða hærri þá er þörf á að verja sig fyrir geislum sólar. Sé stuðullinn 2 eða hærri þá getur verið þörf á sólarvörn ef verið er lengi úti í sólinni eða ef um viðkvæma húð er ræða.

Við minnum fólk á að verja sig gegn geislun sólarinnar, t.d. með flíkum, sitja í skugga, nota sólarvörn og takmarka þann tíma sem fólk er óvarið í sól. Við minnum alveg sérstaklega á börnin í þessu sambandi.

Að lokum bendum við á gott viðtal við Birnu Þórisdóttir, sérfræðing í forvörnum hjá Krabbameinsfélaginu í Morgunútvarpi RÚV https://www.ruv.is/frett/ekkert-sem-kallast-holl-solbrunka.